بيانات غلط ومعلومات مش صحيحة

#لما_تطلعوا_بيانات_غلط
وتقولوا إن 9500 واحد بس عدد الإصابات في شعب تعداده 100 مليون يبقى ...
لازم الناس تستهتر .

لما تقولوا إن اللواء اللى مات علشان كان بيطهر الشوارع على الرغم إن أقل واحد او طفل في البلد عارف إن لواء الجيش مش هينزل أبداً مع عربيات الرش يبقى ...
لازم الناس تستهتر .

لما تكتشف أول حالة كورونا يوم ١٤ فبراير وتتلكع وتستهر في تأجيل المدارس والجامعات لمدة شهر كامل يبقى ...
لازم الناس تستهتر .

لما تبعتوا وزيرة الصحة بتاعتنا تتصور في الصين مرة بكمامة ومرة من غير كمامة وتيجي تعمل مؤتمر صحفي بعدها ب 24 ساعة من غير عزل ولافحص ولابتنجان يبقى ...
لازم الناس تستهتر .

لما تقول للغلبان أقعد في بيتك ماتنزلش من غير ما تقول له هيدفع غاز وكهرباء ومياه وهيأكل عياله منين يبقى ...
لازم الناس تستهتر .

لما تخلوا سعر التحليل 1000 جنية في بلد ٥٠٪ منها تحت خط الفقر ومافيش عزل صحي ولاتنظيم  بدون رعاية يبقى ...
لازم الناس تستهتر .

لما تخبوا الأعداد الحقيقية للمصابين  والوفيات والدكاترة والتمريض نفسهم مش لاقيين رعاية عشان يراعوا الناس يبقى ...
لازم الناس تستهتر .

لما تقفلوا دور العبادة الكنائس و المساجد وتمنع الصلاة وسايب المواصلات العامة كلها و مترو الانفاق اللي الناس بتبقى فيه لاصقة فى بعض حرفياً من الزحام
وسايب الشوارع بزحمتها والطرق بتكسيرها ومخلي الناس فوق بعض في المصالح الحكومية والسوبر ماركت والهايبر يبقى ...
لازم الناس تستهتر .

لما وزير التعليم العالي يطلع يقول ان التيرم زي ما هو ومش هيتأجل رغم إن أكبر الجامعات فى العالم والأولى في التصنيف العالمي لغت الترم يبقى ...

لازم الناس تستهتر .

وفي الآخر صفحات الفيس بوك والسوشيال ميديا كلها نازلة شتيمة في الغلابة
ولو الأزمة عدت على خير هتبقى أجهزة الدولة الجبارة نجحت برغم جهل الشعب
ولو الأزمة دمرت البلد هيبقى الشعب الجاهل هو السبب !

لما يطلعوا أكبر رجال الأعمال عايزين يموتوا الشعب وأعضاء النواب المحترمين مستخبين عن أهالي دايرتهم ولما يطلعوا المشخصاتية والراقصين ينصحوا الشعب يقعد في البيت ياكل تراب وهما بياخدوا ملايين
ولعيب كرة مش عاجبه 12 مليون في السنة ونص الشعب مش عارف يصرف 500 جنية .

أنتم إللى إستهترتوا بأرواح الناس من البداية متجوش تلزقوا بلاويكم في الغلابة..

( وما خفي كان أعظم )